Gaur egungo kazetaritzaren oinarri sendoenak
inprentak jarri bazituen ere, honen erroak lehen
hiri-zibilizazioetaraino iristen dira, hots, erromatarren 
inperioraino; garai hartan, baziren zenbait berri-paper
(acta diurna, acta senatus) kazetaritzaren
aintzindaritzat jo daitezkeenak. Baina beharbada, zentzu 
hertsian lehen kazetaritza-argitalpenak ez ziren XVI. mendera
arte iritsi, Polonian katoliko eta protestanteen arteko auziari
buruzko aldizkari bat kaleratu zen arte. 
	XVII. mendeko lehen urteetan aldizkako prentsa
erregularra (hilabekariak eta astekariak) argitaratzen zen
Alemanian, Herri Behereetan eta Ingalaterran. Mende hartan, 
postaren erabilerak prosezua (albisteen harrera, inprimatze
eta hedapena) bizkortu zuen, eta kazetaritzaren merkatua 
posta zerbitzua zuten hiri guztietara hedatu zen. Honekin
batera, gaurkotasunaren kontzeptua garatu zen, irakurleak
bere inguruan gertatzen zenaren kontzientzia handiagoa
hartzen baitzuen. XVII. mendean frantses prentsa izan zen
nagusi, eta XVIII.mendean ingeles estiloko iritzi kazetaritza
eta prentsa politikoa nabarmendu ziren. 
	Lehen egunkaria 1702an azaldu zen Ingalaterran
(The Daily Courant), baina egunerokotasuna, oro har, ez zen 
guztiz sendotu XIX. mendearen hasiera arte. XIX. mendearen 
hasierako aurrerapen teknologikoek eta gizartean gertatzen
ari ziren aldaketek egunkaria komunikabide masibo bilakatzea
ekarri zuten. Egunkariak sendotzearekin batera, gainerako
argitalpenak (astekari, hilabetekari, eta abarrek) beste
espezializazio-alorrak jorratu zituzten. Informazio-premiak 
eraginda egunkari batzuk goiz eta arratsaldeko argitalpenak
egiten hasi ziren eta lehen berri-agentziak sortu ziren.  
	XX.mendearen hasieran komunikabide berriak
sortzeak espezializazioa areagotu zuen. Irrati eta telebista 
agertzean kazetaritzaren betiko euskarri idatzia aldatu zen 
eta albisteak askoz lasterrago hasi ziren zabaltzen. 
	1924an irrati-difusioa, sortu zen eta honen
berehalakotasunak komunikabide idatziei aurrea hartu zien. 
Geroztik, telebista merkaturatzeak eta Bigarren Mundu Gerraz
geroztik, teknologi mailan (informatika eta industria teknologikoa
bereziki) izandako aldaketak aipatutako komunikabideen 
espezializazioa bultzatu du. 
	Finantza eta industria handiak masa 
komunikabideak bere menpe hartu dituen neurrian
kazetaritzaren iharduera aldatu egin da. Azken urteotan,
burokratizazioa gero eta handiagoa izatearekin batera,
kazetaritzak iritzi publikoa kontrolatu eta osatzeko funtzioa bere
gain hartu du.